دوغولدوم آنادان گونون بيرينده

جوشمادي ياشاماق قانيمدا منيم

يئر وئرين دوستاغين قارا يئرينده

بئله مي يازيلميش آلنيمدا منيم؟!

اؤلومون حسرتي باغريمي ازيب

سوچومو بيلمه دن دوستاغا دوشدوم

كونده لي زنجيرلر قيچيمدا گزيب

دوستاغين آلچاغين اوجاسين اؤشدوم

بوراسي دونيامي يا قارا دوستاق

چوخونا جننتدير سورار كن بيلديم 

منده چوخلاري تك گونشدن ياساق

قارانليق دوستاقدا عومرومو سيلديم

ياشاركن آراديم آزادليق يولون

ازلدن آيدينليق يولچوسو اولدوم

بولماديم هئچ زامان بو يئرلرده من

دوشونمك زوروندا سارالديم سولدوم

آنلاديم دونيانين بير گونشي وار

گوجلولر ايشيغين يوخسا اوغروللار!

دئييللر هامينين بوندا سهمي وار

عدالت آديلان قارا دوغروللار

بوراسي دونيادير بيرينه جننت

بوغولور كئف ايچره كئف چكير دارا

بيرينه دوستاقدير چاليشير فقط

عومرونو بير گئجه ياواش قورتارا

بوراسي دونيادي قويونا _قوردا

بير شكيلده يازيليب هامييا بو آد

فيرلانان فه له يين چرخي دي بوردا

بيرينه ترسينه بيرينه آواد

حقيقت ايتيريب بوردا معناسين

اوركلر داشداندي سئوگي دميردن

سنه لر آچيبدي هر شئيين پاسين

سسله نير اينسانليق بوردا قبيردن

بورادا سئوگييه گوونمك  اولماز

گرچكدن سئويشه ني بوردا ييخيللار

ويجدانسيز بو حايات دالغالاريندا

سئودالي جانلارا قورشون سيخللار

بوراسي دونيانين سوري(سوريه )اوداسي

قودرتلر يئر گؤيو بورادا ساغير

باخسانا جينايت پرده لرينه

ياغمورلار يئرينه بومبالار ياغير

دونيانين سونودور دئيه سن بوردا

اولدزلار سؤنركن بير_بير اله نير

آنالار ساچلارين يولور سوقاقدا

گوناسيز جوجوقلار قانا به له نير

قاوزانير گؤيلره اوغول واي سسي

ائشيدن يوخدومو؟ دويان يوخدومو؟

بين الخالق حاققينا ده يه ر وئرنلر(بين الملل)

اينسان سيزلرده ساقين يوخدومو؟

يازديغيز ياسالار نه يه گركدير؟

گركدير مظلوملار سيزلره ائيسين

فيليسطين،سورييا داردا باغيرير

ياسانيز بودورسا باشوزا ده يسين

بوراسي دونيانين دوستاق هاواسي

درديني بيلن يوخ كيمسه سيزلرين

آچماميش سولوبدو چيچك باخچاسي

گؤرمه ديم هئچ زامان گول بنيزلرين

اينسانليق عدالت نه بيليم نه لر 

آغيزلار به زه يه ن ساده جه بوش سؤز

باسيللار بورادا گوجلو كيمسه لر

يازيقلار كؤكسونده كؤز اوستونه كؤز

بورادا قالماغيم نه ييمه گرك

گركدير تانريلار قارشينا چؤكم

گزيشير بئينيمده كؤچمك هاواسي

قارانليق دوستاغي گركدير سؤكم

اي اؤلوم تانريسي دئ گل هارداسان

اؤلومله سئويشن بيريده منيم

اولمويا منيم تك سنده دارداسان

منه كي ياشاماق اولوبدو قنيم

دونيانين بوتونو فيرتينا اولسا

هاميسي گلجك منم باشيما

بيرآنليق اوره ييم سئوينج بولسا

سانجيدان زهرلر دولار آشيما

هايدي گل دايانما نفسيمي كس

ايچديييم زهردير چكديييم آجي

يوبانما هارداسان بودا بير نفس

يئتمزمي بوقدر چكديييم آجي؟

دوغوردان يالانميش _يالانميش دونيا

يازيليب عومرومه باشقا بير بؤلوم

ان بؤيوك شوعاريم هر زامان بويا

سعادت اؤلمكدير ياشاسين اؤلوم.

آردینی اوخو
گؤنده ر     بؤلوم لر: