+0 beyen
اورادا بير جوجوق وار
حالادا ديل آچماميش بير جوجوق!
هانكي بير جوجوق اونون كيمي سوسموش؟
حادي -اوردا بير جوجوق وار
هئچ بير قوجاغا قاچماميش بير جوجوق!
هانكي بير جوجوق اونون كيمي كوسموش؟
كيم ليسيني بيلمم-
آما گوزلري ياشارمادان آغلار؟
گوزگولرده گوروشوروز غاليبا
بير آزدا هئچ نه ييمه بنزر!
كسينليك ايله كيم لييني بيلمم
آما دوداقلاري قاچمادان گولر-
اده............همن كي گوندوزه چاتماغا
آخشاما تك بكلر
اده.................همن كي گئجه ني گورمه يه
سحره تك گوزلر!
همده ساقيناراق اوسكورور
ديشاري سيچراماسين بيردن
ديش ديبينده گيزله دييي سوزلر!
اورادا بير جوجوق وار-
هئچ زامان آجماميش بير جوجوق!
آما هانكي بير جوجوق اونون كيمي قان قوسموش؟
آي مين ياشاديغيم بو فلاكت!
اوردا بير جوجوق وار
همن كي توپراغا چاتماغا چوللر گزميش!
همن كي سويا وارماغا دنيزلر اوزموش!
همن كي هئچ زامان بئزمكدن بئزميش!
آي مني وطن آدلي بو غربت!
آما بو كره ني دوغرو سويله رم واللاهي!
بير عجاييب ايش-
منيمله كولگه م آرا هئچ بير اويوشوق يوخ!
اورادا بير جوجوق وار.
من هئچ كيمم! سن كيم سن؟
سن ده مي هئچ كيم سن؟
بئله ليك له بير جوت واريق-قونوشماغا!
اونلار بيزي آوارا ائده جكلر بيلرسن.
نه قدر اييره نج دير كيمسه اولماق!
نه قدر اوتانمالي دير -بير قورباغا كيمي
(گون بويو -آديني بير اويونج گوله سويله مك!).......................
گؤنده ر
بؤلوم لر:
+0 beyen
گوجوم يئتمير سنه چاتام
وارليغينا فرحله نيب گيريب قوجاغيندا ياتام
سانكي ياتاق يئريم منيم توپراقلارين قوجاغيدير
بلكه ده قارشيمي كسن سال قايالار بوجاغيدير!
آمما ريجا ائيله ييرم بير كره ايذن وئر منه
ذرره گوجوم وار باخيرام
فيكير ده لي كؤنول دولو ايچ_ايچيمي هئي سيخيرام
يوخسا ياشام داغلارينا بولود_بولود غم ياغيرام!
ايمكان اولورسا دونيا
سون نفسي سويا_سويا
سني اوركدن باغيرام.............................
گؤنده ر
بؤلوم لر:
+0 beyen
حئي سنينله يم حيه تيميزده كي سويود آغاجيندان قوجا تانري!
سني اوره ييمجه سئوسم ده
شعريم سنه قارشي عصيان سيلاحيم دير
يئني دونيالار ياپيرام منده ياشايانلارا
و شعريم ياشاييش سندي دير
نه
سنين جلادلارينين اولوم فتوي سي كيمي دير شعريم
نه ياشاييشين ياس كيمي دير شعريم
منيم شعريم ده كي دونيادا
گورونمه ييب
آجيندان ببك لري آغاران بير اوغلان
گئجه ياريسي
آناسين قبريني قازيب
و قيزيل ديشيني داشلا سينديرا!
نه بيليم بلكه ده سن حاقلي سان اوجا تانري؟
گؤنده ر
بؤلوم لر:
+0 beyen
1-من نه بيله رديم كي واز كئچه جه كسن
اؤزوندن ده چيچك!
مندن ده چيچك!
من نه بيله رديم كي آند ايچه جك سن-
گؤرمه يه سن مني گئندن ده چيچك!
ياشايا بيلمه دين اؤزون سئوگيني
تكجه كيتابلردا آرادين اونو....
2-ايچه ريم اود تپير-آنجاق قيش گونو
آچيلمير اليمين -اوزومون دونو!
منجه سفسطه دير هرنه دئييب لر
بيليم لر سئوگي يه يئتيشجك جاييب
باليغا اوزمه يي اؤيرتمه ييب لر-قوشلار اوچماق ايچين مكتب گؤرمه ييب !
عاغيل لا اؤلچولن سئوگي اسكيله ر
ايسته ميرم بيلم ندن سئوردين-ان بؤيوك سئوگي لر ندن سيز ديلر!
بلكه يوخولاردا گؤروشك چيچك!
كؤرپه گؤزلريني گؤزومه تيكمه! سوزمه اوفكه دولوباخيشلا مني
گوناه اؤزوم ده ايدي -دانميرام كي من
يوخ باغيشلا مني -باغيشلا مني نه بيليم بلكه ده حاقلي ايدين سن!
گول يامان گونومه گولدويون كيمي!
سوسما هئچ اولماسا آجي سؤزله گل
باغلان بوغازيمدا بير دويون كيمي! هئچ گؤزه للييينه قييماديم كي من
كئشگه بير گئجه ليك اؤزوم اولارديم حتي قييمادي كي قلبينه ده يسين
مينلرجه آرزيمين مزاري قلبيم!
من نه بيلرديم كي واز كئچه جك سن....!؟
گؤنده ر
بؤلوم لر:
+0 beyen
قارانليق گئجه لر سئمفونيسينده
ياغمورون خفيفدن توپلانان سسي
بالتالير سن سيزكن سينيرلاريمي
قيريلير كؤنلومون هر بير حيسسه سي
سن يوخسان يالنيزليق سولطانليق ائدير
دورد ياندان اوستومه اوردولار باسير
سيخيلير اودامدا فيكير قارتاليم
شاعيرليك دويغومو قارانليق آسير
ووجودوم قورخودان ايچيمده اسير
بوغولور ديليمده هاراييم هئييم
نيفرتدن ديشلريم ديليمي كسير
بئله مي سئوداليق بئله مي بئييم؟
من سني سئوميشديم قوووشماق اوچون
ندن بو آيريليق نييه بو حئرمان
اولمويا مجبورن سن مني سئودين
جبريدن اوزانير يوخسا بو هيجران
بير داها داليرام بو سئوگي باشدان
نه يي بيز سهو ائتديك هاردا بيلميرم
اولمويا اونوتدوق محببت ايزين
بو سئودا قويلاندي قاردا بيلميرم
اوستومه چكيلن ايندي هر آخشام
حسرتدن سيغريلان آغير بير يورقان
من يالنيش ائله ديم يوخسا سن جانيم ؟
دالبادال اوچوروم آراميز يارقان
گؤنده ر
بؤلوم لر:
+0 beyen
دوغرو شاه ماتچي اوتاممازدي گوءزللر اوتاني
سانماكي اوءز باشينا مجنونا مجنون دئديلر
كلله دن ديرناغينا لئيلي هارايلاردي جاني
من گونش جيلوه سينه هاردا باخا بيلمزديم
سنين اوءز مهرينيدي وصلينه چاتديردي ماني
ال آياق سيز چولودم گوءتدو مني سئل اوءنونه
او گئدركن مني دريا ايچينه سوردو داني
بو شراب بايداسي هاردان گوءره سن ال كيميدي
بزمي گزديكجه آليب چيلغين اوره كلرده قاني
قاشلارين طاقي يقين الده كي مينو سن ايدين
بير باخيشلا سوپوروب منده بوتون آد نيشاني
اوءز-اوءزون اوءيره ديبن سن اودو ياخدين جانيما
بير تاماي اوزله مني كيم بوگونه سالدي ياني
دئ يولوندا واريديق بير نئچه دوست بيز هاميميز
قاش گوءزون توشلادي يالنيز مني آنديم او آني
هاميميز وورغونودوق قورخو اوره كلرده . غمين
آدلاييب هامميسيني منله قونوشدو زاماني
گؤنده ر
بؤلوم لر:
+0 beyen
آچين پنجره ني آچين قاپيني
قالديرين گون گئچمز بو پرده لري
دارالير بوغولور گئجه باغري تك
ايچيمين دويغوسال پتانسللري
اوءلوره م- اوءلوره م- اوءلوره مندن
قويمورسوز سئوگيلي گونومو گوءره م
سيز آللاه بوراخين آد وئرديم سيزه
ايستيره م گونومون ساچلارين هوءره م
بوراخين بو سحر اوستومه سرسين
او قومرال ساچيندان درمان بولاجام
سيم سيجاق ساراجام بم بياض جانين
سولورسام بيلين كي اونلا سولاجام
بوراخين گونشي اوداما گيرسين
دوءرد ايلدير دوستاغام اونون عشقيندن
آييرماق فيكريني باشدان چيخاردين
قورخون غضبيمدن قورخون كينيمدن
خسته يه م يورقونام بوراخين گلسين
سون قويون بو هيجره اينسانسيز اگر
بوراخين-بوراخين-بوراخين سيلسين
گوءزومونه ياشلارين دويموسوز مگر
سايماسيز بوياشلار ائويزي ييخار
سينايين ايسترسيز سيناقا ده ير
سينديرين كوءنلومو قيرين جانيمي
محشرين وارليغين دويماساز اگر
بيز آللاه يانيندا ايلقار باغلاديق
برابر ياشاياق بير عومور سوره ك
يولوموز اوسوتونده توم انگللري
تانرييا تاپشيريب سولماغين گوءره ك
بو يولدا بيز واريق نه قه در ساغيق
گلجك بيزيمدي اومود باغلاريق
شنليگه دولاجاق يارينلاريميز
دوءزومله يارينا حورمت ساخلاريق
گون گلر قوووشاريم نازلي ياريما
اوستومه ساريلار گونشيم ساچار
سيسقالدين سئوگيمي سيتملر آلتدا
بير گونو يئشريب قيرميزي آچار
بير ميثال چكيره م گئچميشدن سيزه
چوخ گوءزل سوءيله ييب اولو بابا لار
قيش گلر توكنر اوزو قاراليق
هميشه بيلين كي كوءموره قالار
گؤنده ر
بؤلوم لر:
+0 beyen
حاليم ندير سوروشمورسان
گوناهميدير سني سئومك؟
ندن منلن قونوشمورسان؟
دوشونمه دن سني آنديم
كوءنول وئرديم ملك قانديم
ملكده نده گوءزل سانديم
ندن منلن قونوشمورسان؟
يازيم آييت سوءزوم آييت
سوءزوم كيمين اوءزوم آييت
دويون وارسا چوءزوم آييت
ندن منلن قونوشمورسان؟
بير دئ دانيش اوره ك سوءزون
مني اسگيك گوءرور گوءزون
يوخسا ندن چوءنور اوزون
ندن منلن قونوشمورسان؟
سئوگي ندير قانير كوءنلوم
سني درمان تانير كوءنلوم
يئنه سن سيز يانير كوءنلوم
ندن منلن قونوشمورسان؟
قونوشارسان دئيه دوءزدوم
گئجه گوننوز جانيم اوزدوم
چيچك گولدن شعير سوزدوم
ندن منلن قونوشمورسان؟
ايستر واز گئچ ايستر ديندير
ايستر قايتار ايستر سيندير
سوءيله منه نه درديندير
ندن منلن قونوشمورسان؟
گؤنده ر
بؤلوم لر:
+0 beyen
قوي چيلپاقجاسينا
چيله سين ياغمور داملالاري
ايسلاناق ال اله
قاچماغا يوواميز يوخ
بلكه سئوداميز بير گونشلي صاباحدا جوءجردي
گؤنده ر
بؤلوم لر:
+0 beyen
بير گئجه گوءزومون اوءنوندن ايتدي
باختيم قارا ايكن لاب قارا اولدو
خبرسيز گئديشي كوءنلومو ديتدي
عيللتين بيلمه ديم بو آيريليقين
آيريليب يالقيزا چئويردي مني
دئيه سن يالاندان اولموشدو چيلغين
بلكه ده مجبورن سئويردي مني
آمما يوخ باغلييدي كوءنلو سئوگيه
دئيه سن گيزلي بير درده يانيردي
سئوگيسي يالانسا آخي بس نييه
گوءزلري سئوگيدن چيپجالانيردي
دوغوردان او مني لاپدا سئويردي
دينليردي درديمي سوءزومو هر آن
سانكي اوره ييني دردلر دئشيردي
ايستيردي دينله يم درديني بير آن
داش اولموش اوره ييم بيلمه دي بونو
ايچينده بوغولدو گيزلي آغلادي
بير حالدا گيزلتدي دردلري آيدين
دينله يه بيلمه ديم يارا باغلادي
بير گئجه مكتوبون گوءردوم واراغا
يازميشدي باغيشلا مني عوذور ايستيرم
اوره ييم دوءزمه دي ويدالاشماغا
خبرسيز گوءزه ليم چيخيب گئديرم
يئنه ده دئييرم باغيشلا مني
آرخامجا گزيبن مني آراما
طالعين حوكمودور دانلاما مني
آغلاييب دوز باسما دردلي ياراما
خبرسيز آيريليق نه چتين اولور
او واخدان حسرتي باغريمي ازير
بولود تك كيشنه ييب قلبيمه دولور
گوءره سن او منسيز هاياندا گزير
يازيقلار-يازيقلار منه يازيقلار
اولسون گركدير من نه اينسانام
اينسانسا اينسانين قدريني بيلر
بيلمه يه ن اينسانا حارامدي ياشام
اينسانلار-اينسانلار سئويب سئويلين
سئوگيزه سئوگييله سئوگي گوءسترين
بئش گونلوك دونيادير نيفرتي سيلين
دردلره دوءزمكله سئومك ايسترين
عومور گئدرگيدير كيمسه يه قالماز
سئوگيلي گونلرين قدريني بيلين
گرچكدن سئويشن حسرته دولماز
سئوينجيز سئوگيزدير اينصافا گلين
ايندي دانلاييرام اوءزوم -اوءزومو
نييه دينله مه ديم من نئجه اره م
ائشيدين دوسلاريم دردلي سوءزومو
ائيله يين سئوگيزه اوركدن كرم
گؤنده ر
بؤلوم لر: