آللاه كيم ؟ من! سن! بيزدن بؤيوك! اؤزودور

او آغلا سيغمايان اوره ك كؤزودور

دونيادا نه وارسا اونون گؤزودور

داغلاردا، كتلرده، شهرده چوخدور

هر يئرده اولار كن هئچ يئرده يوخدور

ياتديغين يوخودا شيرين رؤيادا

چكدييين نفسده گزير پييادا

له لكده، دؤشكده، او سيرت قايادا

ياخشي باخ هر يئرده گورونور آللاه

آنا تك دالينجا سورونور آللاه

آتانين يئنيلمز اوجا ووقاري

جننتي آنانين يورقون آياغي

قارداشين- قارداشا عشقي داياغي

باجيلار كؤنلوندن سوزولور آللاه

بير كؤنول سيناندا اوزولور آللاه

نه يئتيم قيزلارين آرزيلاريندا

نفسين گيزله يه ن  نه دول قاديندا

او خسته اوغلانين هاي هاراييندا

سايمادان يئرلره سريلير آللاه

آياقلار آلتيندا ازيلير آللاه

سيز هئچ داريخمايين  كئفوزده اولون

هوتئللر ويلالار گزمه يه بولون

كئفه كؤتك چكين قاناتين يولون

جننتده پولادير چاتيلير آللاه

دونيا قاپانيندا ساتيلير آللاه

گؤنده ر     بؤلوم لر: